Ko‘p asrlik boy tarix va yuksak ma’naviy-madaniy xususiyatlarga ega bo‘lgan O‘zbekiston zamini azaldan xalqlar va dinlar o‘rtasidagi do‘stona munosabatlar, bag‘rikenglik, birdamlik va hamjihatlik kabi o‘ziga xos ijtimoiy muhit shakllangan yurt sifatida e’tirof etiladi.
Bugungi kunda jonajon Vatanimizda 130 dan ortiq millat va elat vakillari, 16 ta diniy konfessiya vakillari tinch-totuv istiqomat qilib kelmoqda. Turli millatlar va elatlarning madaniyati, tili, urf-odatlari, qadriyatlari va an’analarini saqlash hamda yosh avlodga yetkazish maqsadida 157 ta milliy madaniy markaz faoliyat ko‘rsatib kelmoqda.
Bu yurtda ko‘pmillatlilik shunchaki raqam emas, balki mamlakatning strategik boyligi, ulkan ma’naviy ustunligi sifatida qabul qilinadi.
Xalqlar do‘stligi kunining yurtimizda bayram sifatida keng nishonlanishi mamlakatdagi barcha millatlarning birligi, qardoshligi, xilma xil madaniy merosiga hurmat ulug‘lanishining yana bir ifodasidir.
Sana munosabati bilan milliy madaniy markazlar pavilonining ochilishi mamlakatimizda yashab kelayotgan barcha millat va elatlarning o‘z madaniyati va urf-odatlari, an’analarini saqlab qolish, rivojlantirish uchun yana bir ulkan imkoniyatga aylanmoqda.
