Munosabat
Bugungi murakkab geosiyosiy vaziyat, axborot xurujlari va global muammolar yoshlar siyosati oldiga yangi, jiddiy vazifalarni qo‘ymoqda. Shuningdek, global ekologik muammolar, migratsiya va iqtisodiy beqarorlik nafaqat mamlakatimiz, balki butun dunyo yoshlaridan ushbu muammolardan himoyalanishnigina emas, ularning yechimida faol ishtirokchiga aylanishni talab qilmoqda.
Prezidentimiz Shavkat Mirziyoyev 23 sentabr kuni Nyu-York shahridagi BMT Bosh Assambleyasining 80-yubiley sessiyasi umumsiyosiy munozaralarida “Jahon yoshlarining tinchlik sari harakati” ni ta’sis etish hamda uning qarorgohini O‘zbekistonda joylashtirish tashabbusini ilgari surishi orqali yosh avlodning global muammolar yechimida faol ishtirokini ta’minlash bilan birga ularni ezgu maqsadlar atrofida birlashtirishga, dunyo hamjamiyati diqqatini tinchlik va barqarorlikni mustahkamlashda yoshlarning o‘rni va rolini kuchaytirish zaruratiga qaratdi.
Xalqaro hamjamiyat tomonidan ijobiy qarshi olingan Davlatimiz rahbarining mazkur tashabbusi nafaqat mamlakatimizning tinchlikparvar siyosatini, balki uning yosh avlodga bag‘ishlayotgan yuksak e’tiborini yana bir bor namoyon etdi. Tinchlik va barqarorlik, jamiyatda bag‘rikenglik, o‘zaro hurmat, muloqot madaniyatini qaror toptirishda yoshlarning faol ishtirokini ta’minlash — yoshlarni yuksak ma’naviyat va umuminsoniy qadriyatlar ruhida tarbiyalashga alohida e’tibor qaratishni talab etadi.
Ushbu tashabbusni amalga oshirish doirasidagi sa’y-harakatlar yosh avlodni tinchliksevar, mas’uliyatli va faol fuqaro sifatida shakllantirishda ular o‘rtasida tinchlik, insonparvarlik va bag‘rikenglik g‘oyalarini keng targ‘ib etishga yangi imkoniyatlarni yaratadi, turli millat va elat vakillari bo‘lgan yoshlarning do‘stona hamkorlikda, umumiy maqsad yo‘lida birlashishi, global muammolarga birgalikda yechim izlashi uchun mustahkam platformani shakllantiradi.
Ziyoda Akbarqulova,
Respublika Ma’naviyat va ma’rifat
markazi bosh mutaxassisi
