11 oktabr kuni Respublika Ma’naviyat va ma’rifat markazi xodimlari, “Ma’rifat” targ‘ibotchilar jamiyati a’zolari O‘zbekiston davlat drama teatrida bo‘lib, atoqli rejissor Olimjon Salimovning Erkin A’zam asari asosida sahnalashtirgan “Ishlaganday bo‘laylik” spektaklini tomosha qilishdi.
Sahna asarida millatni yemirayotgan illatlar, ijtimoiy-axloqiy masalalar tanqidiy ruhda, o‘zgacha rakursda ifoda etilgan.
Ushbu pesada o‘z-o‘zini aldayotgan olomon, yolg‘on normaga aylangan jamiyat haqida. Spektakl janri satirik fars bo‘lib, bu janr o‘z-o‘zidan bo‘rttirishni, grotesk yondoshuvni taqozo etadi. Sahnadagi hamma narsa, ssenografiya, liboslar, aktyorlar ijrosi, musiqiy bezak – barcha ifoda vositalari shu janrga, talqinning umumiy stilistikasiga uyg‘unlashtirilganini ko‘rish mumkin.
Mazkur spektakl ma’naviy-ma’rifiy soha mas’ullarida o‘zgacha taassurot qoldirdi, qizg‘in muhokamalarga sabab bo‘ldi.
Dam olish kunlari shu kabi madaniyat maskanlariga borish, ham xordiq, ham ma’naviy ozuqa olish har bir davlat xizmatchisi uchun manfaatlidir.
