Markazda ayni mavzuda seminar tashkil qilindi. Unda Markaz rahbari Otabek Hasanov ham ishtirok etib, yangi tahrirdagi Konstitutsiyaning mazmun-mohiyati va uning hayotimizda tutgan o‘rni, muhim ahamiyati haqida fikrlar bildirdi. Xususan, Konstitutsiya asosida inson huquq va erkinliklari sohasida mutlaqo yangi bosqichga o‘tilgani, ijtimoiy, madaniy-ma’rifiy sohalarda amalga oshirilayotgan keng ko‘lamli islohotlar va bu borada erishilayotgan natijalarda mustahkam huquqiy asos bo‘layotgani e’tirof etildi.
Seminarni “Ma’rifat” targ‘ibotchilar jamiyati a’zosi, yuridik fanlari doktori, professor - Mirodiljon Baratov olib borarkan, Konstitutsiya – biz uchun nafaqat muhim hayotiy qo‘llanma, balki g‘urur-iftixor, kerak bo‘lsa, shu zaminda istiqomat qilayotgan, millati, tili, dinidan qat’i nazar, barcha insonlar uchun mustahkam himoya ekanini, u nafaqat bugungi kunning qomusi, balki ertangi kunimiz, qurayotgan jamiyatimiz istiqbolini aniqlab beruvchi hujjatligini ta’kidladi. Shunday ekan, Konstitutsiyani chuqur va har tomonlama o‘rganish, uning mohiyatini anglab, amaliy hayotimizning doimiy qo‘llanmasiga aylantirishimiz zarur.
