Adabiyot shu qadar qudratliki, u inson ongi, tafakkuri, his-tuyg‘ulari va ma’naviy olamiga ta’sir qiladi. Zo‘r ijod mahsuli, misol uchun she’r, hikoya, badiiy asar bizga zavq, o‘zgacha shijoat baxsh etadi, hayotga bo‘lgan qarashlarimizni o‘zgartiradi, yuksak maqsadlar, ezgu amallarga ilhomlantiradi.
Bugun qalblarda yurtga muhabbat, elga sadoqatni jo‘sh urdiruvchi, daxldorlik hissini kuchaytiruvchi, g‘ayratimizga g‘ayrat qo‘shuvchi, fidoyilikka undovchi, jamiyatda milliy ruhni uyg‘otib, milliy birlikka chorlovchi ijod namunalariga ehtiyoj bor.
Demakki, adabiyotimiz namoyondalari, yozuvchi, shoirlarimiz oldida nihoyatda zalvorli ammo sharafi ulug‘ vazifa turibdi.
Yozuvchilar uyushmasida bo‘lib o‘tgan uchrashuv ayni masalalarga bag‘ishlandi. Vatansevarlikni, shijoatni oshiruvchi she’rlar yaralib, qo‘shiqlarga aylanib xalqni birlashtirishi, tahdidlar kuchaygan tahlikali zamonda ezgu g‘oyalarga yo‘g‘rilgan asarlar bilan ong va qalbga ta’sir qilish, bir so‘z bilan aytganda, targ‘ibotning g‘oyaviy jihatlarini o‘rganish zarurligi aytildi.
