Yig‘ilishga Ekspertlar kengashi raisi, professor A.Mavrulov rayislik qildi. Dastlab "Ma’rifat" targ‘ibotchilar jamiyati raisi B.Xusanovning joriy yilning birinchi choragida jamiyat tomonidan amalga oshirilgan ishlar yuzasidan hisoboti tinglandi.
Shundan so‘ng yig‘ilish kun tartibida O‘zbekiston Respublikasi davlat mustaqilligining shonli 35 yillik bayramini yuqori saviyada kutib olish masalasi doirasida fikr mulohazalar tinglandi. Xususan, ta’lim muassasalari uchun mo‘ljallangan “Mustaqillik soatlari” loyihasining yangilangan namunaviy dasturi hamda jamiyatdagi dolzarb ma’naviy-axloqiy masalalarga ilmiy yechimlar izlovchi “Ijtimoiy g‘oyalar forumi” loyihalari muhokama qilinib, ularni takomillashtirish yuzasidan takliflar berildi.
Joriy yilning may-sentabr oylarida respublika miqyosida “Yagona Vatan, yagona xalq bo‘lib, yangi hayot va kelajak yaratamiz!” shiori ostida o‘tkaziladigan “Mustaqillik to‘yi” festivaliga alohida to‘xtalib o‘tildi. Xalqimiz jipsligini va inson qadrini namoyish etuvchi ushbu ma’rifiy loyiha doirasida yetakchi olimlar, ziyolilar va san’atkorlar ishtirokida 10 dan ortiq ijtimoiy-madaniy loyihalar, xalq sayillari va yoshlar bilan muloqotlar tashkil etilishi rejalashtirilgan.
