YAGONA VATANMIZ, BITTA XALQDIRMIZ!
Ikki daryo poyin o‘pgan gul diyor,
Osiyo yuragi bo‘lgan shul diyor.
Pok niyat, pok amal, azim kelajak –
Barchasiga Vatan bo‘lgan shul diyor.
Birlashsak shijoat, azmu shahddirmiz,
Yagona Vatanmiz, bitta xalqdirmiz.
Bobom ekkan nihol zo‘r himmat menga,
Momomning allasi chin hikmat menga.
Otamdan, onamdan merosim Vatan –
Uni asramoqlik saodat menga.
Tomirda oqqan qon, shiddat, jahddirmiz
Yagona Vatanmiz, bitta xalqdirmiz.
Dunyoning beshigin tebratgan bu el,
Yo‘qdan bino qilgan, yaratgan bu el.
Karvonida ilmu ma’rifat tashib –
Ne-ne dovonlarni titratgan bu el –
Shiddatim balamda, yana qalq dermiz,
Yagona Vatanmiz, bitta xalqdirmiz.
Qadim tarix yo‘li kimga pinhondir,
Kecham ham bugunim senga ayondir.
Mening dono xalqim, donishmand xalqim –
Hamisha yaxshilik, mardlik tomondir,
Mardona bobolar yo‘li ahddirmiz,
Yagona Vatanmiz, bitta xalqdirmiz.
Yer yuzin yondirar urush to‘zoni
Go‘daklar faryodi tutar samoni.
Mening Vatanimda shodiyona to‘y –
Ma’rifat zamoni, millat zamoni,
Temur tutgan bayroqdek yakka shahddirmiz,
Yagona Vatanmiz, bitta xalqdirmiz.
Aytay qay birini – bahodirlarim,
Vatan – orim degan qancha zo‘rlarim.
Muqaddas yurt sha’ni ko‘ksida tumor –
Dunyolar tanigan Javohirlarim.
Raqibni mot aylab turgan taxtdirmiz,
Yagona Vatanmiz, bitta xalqdirmiz.
O‘z-o‘zidan bunyod bo‘lmas imorat,
Yurt taqdiri nomus ila jasorat.
Xalq qismatin o‘zin qismati degan –
Bedor zotning hayotidan iborat.
Qadamlar zalvorli – qutlug‘ ahddirmiz,
Yagona Vatanmiz, bitta xalqdirmiz.
Ey, ilm-ma’rifat, nurlar, birlashing,
Yuragida olovi borlar, birlashing.
Ey, Vatan tarixin bitayotganlar –
Allomai zamon, pirlar, birlashing,
Birlashsak, el degan yorug‘ baxtdirmiz,
Yagona Vatanmiz, bitta xalqdirmiz,
Yagona Vatanmiz, bitta xalqdirmiz!
Sayyora To‘ychiyeva
"Ma’rifat" targ‘ibotchilar jamiyati a’zosi
"Ishonch" gazetasi
Rasmiy sahifalarimiz👇
🚨telegram | 📎Facebook
📺YouTube | 👚Instagram
